الجمعة، 27 مارس 2009

بلد الامن والامان

خير اللهم اجعله خير
جاني خبر التفجيرات
حسيت ان واحد من اهلي مات
قلت ليه
طب ازاي
طب بكام
باعوا البلد للئام
كل ديه اسئلة في الاذهان
قلت مين قتل مسكين
طب حد مات
من سكات في التفجيرات
قالوا طفلة وكام اجنبي والباقي اصابات
لمصلحة مين
يبيع سنين من الامان
لما تتضرب اجنبي
طب والنبي
ده اسمه كلام
ده ضيف عندك
جوه بلدك
وعايز تضربه بالنعال
شيل الكلام ده من دماغك
وتفكيرك في الارهاب
لا عمر ده كان من الدين
ولا من عوايد الاسلام
لمصلحة مين
تشمت فينا الامريكان
وكمان ولاد العم سام
بحجة ضاع من مصر الامان
قلت مجنون الي يموت
ويموت معاه الابرياء
بيجروا على لقمة عيشهم في الزحام
وامنيتي الي عملها يبقى في خبر كان
او اشوفه في بدلة الاعدام
وميستهلش يبكي عليه حد
الي عايز الجبل ينهد
جبل الامان
بنناه زمان
بدم شعبنا الي مات
ويا ريت الاقي لسؤالي جواب
قبل ما يدخلوا علينا الذئاب
ومن سكات خلص الكلام
وهتفضل مصر بلد الامن والامان

الأربعاء، 18 مارس 2009

تملي غتيت


دائما ما نصادف اشخاص غير مؤهلين للتعامل البشري او يكون لديهم عيوب واضحة ظاهرة عيانا بيانا لمن يراهم فينفر عنهم ممكن ان يكون ذلك هو طبع مكتسب او طبع اصيل فمن هؤلاء من يصيبك بضرر مباشر او غير مباشر لمجرد تعاملك معهم ومن هؤلاء الاشخاص من نطلق عليهم الرخماء او الغلسيين حتى وقع اختيارنا على اسم يدل على شخصيتهم هو



تملي غتيت

هذه الشخصية موجودة في حياتي قهرا معنديش اختيار اني انفضلها او اقلبها بس على اد الامكان بحاول ابعد عنها عشان ربنا يكفينا غتاتها هحكيلكم شوية مواقف حصلت وانت احكم بنفسك بقا على الشخصية ديه

خد عندك يا سيدي

تعارفنا كان من الحي الي عايش فيه كنت بنلعب كورة مع بعض في الشارع يا عم نوادي ايه كبر الشارع عندنا واسع المهم دخلت جامعة القاهرة وهو بعديها بسنتين او سنة تقريبا حصلني على الرغم انه اكبر مني ب3 سنين متفهمش ازاي .

تملي غتيت: عمور عامل ايه وايه اخبارك انت في ايه

انا جامعة القاهرة

تملي غتيت :طب كويس ده انا هناك نتقابل طب هات رقمك ( كانت اكبر غلطة في حياتي ) لغاية دلوقتي الحياة تمام خالص مفيش مشاكل ولا اي حاجة اصبر بقا مستعجل على رزقك ليه التقيل ورا اتصل بيا في يوم عمرو انت فين انا في الدقي رايح الجامعة طب لما تيجي رنلي رحت الجامعة نسيت ارنله (حكم الشن بقا يا ابني ) قابلته

تملي غتيت : الله عمرو انت الشباب عندكم كويسين .

انا : طب ما تيجي تقعد معانا يا تملي (تاني اكبر غلطة في حياتي )

تملي غتيت : طب قشطة بكرة بقا .

تاني يوم جه تملي قعد معايا والحياة لسه وردي وانا جنبك وانت جنبي وتمام خالص وانا في دماغي سؤال طب ليه ملهوش اصحاب وبعدين ده سنه كبير المهم قولت في قرارة نفسي ديه مراهقة متاخرة عايز يعيش معانا خلال اسبوع بقا اتصل بيا اكتر من كتير اوي كده من المرات لغاية اما زهقت قابلته تاني قعدنا مع الشلة الجميلة اللطيفة بتاعتي دخلت واحدة زميلتنا عمور عامل ايه ايه اخبارك بتاع ابص لصاحبنا تملي غتيت الاقيه هياكل البت رحت غمسته انه يتقل وبعد كده عرفته بعد اما مشيت

تملي غتيت : عمرو انا عايزك تقربني منها عشان عايز ارتبط بيها .تخللوا من اول مرة قلت بس الواد وقع وبتاع


شوية دخلت واحدة تانية عمور هارتي ايه اخبارك مبتسالش وبتاع قلتها اه معلش بقا ظروف عموما هكلمك باليل بس بابا عيان دلوقتي انا: الف سلامة ربنا يطمنك عليه بعد اما مشيت


تملي غتيت : عمرو انا عايزك تعرفني عليها عشان عايز ارتبط بيها . تخللوا تاني بنت في حوالي ربع ساعة


كل شوي علي كاتخنقت انا بقا رحت منفجر ايه يا ابني انت عايز مين ولا مين ارسالك على حل يا عم الحج

انا عديت كده هو انا عرفته على كام بنت كان عايز يرتبط بيها حوالي 7 او 6 تقريبا و كلهم بيقابلوه بالرفض واحنا اصحاب بس يا تملي وصلت انه هزء واحدة نفضتله انما صحيح تملي غتيت بس الحمد لله مبقاش يسالني على حد تاني عشان قطعت الحوارات جيه ما بنا طب والله العظيم مرة كنت واقف مع المدام ومكنش يعرفها قالي عرفني عليها عشان ارتبط بيها افتكرته بيهزر طلع بيتكلم بجد قولتله ديه المدام يا تييييييييت وكلام من ده بقا


خد عندك موافق تانية يا سيدي انت هقت اصبر التقيل لسه جاي

بس كله كوم وحوار السجاير ده كوم تاني تملي غتيت ده معاه فلوس يعني ممكن يشتري سجاير متخصص سلف سجاير من صحابنا لدرجة ان الكافيه الي بنقعد عليه بدأ يستلف من الواد الي شغال فيه يا ساتر عليك تملي غتيت وبعد اما مثلا ياخد السيجارة من الواحد يا جماعة شوف احترم فلان ده ياهوي ده كمان بيديني الولاعة اولع السيجارة على اساس يعني ان قال ايه بقا عنده سينسور واشعال ذاتي للسجاير ما هو لازم هيديك سيجارة وولاعة عشان تولع


خد عندك اخر موقف بتاع النتيجة


الواد ده يا جماعة وشوا فقر على اي حد عندنا اصحابنما في تجارة حوالي 18 او يزيدون كلهم جايبين مواد الا واحد بس مع العلم انه فيه كذا واحد كويسين بيجيبوا جيد و كده ده حتى جاب النتيجة لنفسه شال مادة الواحد ممكتن يكون عايز يخدم بس مش لدرجة اني اجيب لصحابي كلهم النتيجة مثلا لو لقى نتيجةوحشة يتصل بصاحبها ويقوله ايه بقا لو شايل مادة محمد بيسلم عليك ولو اتنين محمدين بيسلم عليك لو ازيد لا قدر الله يقولو امة لا اله الا الله بتسلم عليك مش ممكن يخرب بيت خفة الدم الي طالعه منك تملي غتيت بجد مش معقول

يبلغ النتيجة الوحشة لصاتحبها وضحكة صفراء شقراء زي العيال بتوع الاجانب الرخمين دول بس والله الحمد لله ان نتيجة الكلية بتظهر في الساحة مش على النت . بجد انا شيلت مواقف كتير جدا جدا جدا من موافقه وهو بجد شخص مصلحجي جدا يتتصل الصبح بواحد صاحبنا ينزل معاه الجامعة عشان العربية واول ما يوصل الجامعة يتصل بواحد تاني لو ملقاهوش عشان البنات ( ده طبعا بعد اما عرف ان مش ورايا رجا ) لدرجة ان اخر مرة اتصل بيا فيها كانت من حوالي 3 شهور عشان ياخد النضارة بتاعتي وتخللوا اتصل الساعة 3 الفجر عشان ياخد النضارة عشان فيه بنت معينة نازلة بكرة والله اتصل بيا حوالي 4 مرات في الفجر عشان النضارة كل مرة بعتذرله بحاجة شكل يالهوي يا جدعان على ديه شخصية قرفت اهلي البعد عنها غنيمة


انا بنصح كل واحد يعرف تملي غتيت يبعد عنه شوية بشوية عشان ميتعديش لانه فيروس بجد ولطلبة الثانوية العامة قبل ما تدخلوا الكلية اعرفوا بتطلع ع النت ولا ع الساحة بتاعة الكلية .


انا بنصح كل واحد فيه عيب من العيوب ديه يعيش للناس وبلاش طمع و لا مصلحة حاول تنفع الناس دور على حقوق الناس قبل ما تاخد حقك هل انا متحامل ع الشخصية ديه بتاعة تملي غتيت ولا هو فعلا تملي غتيت؟

واتلي اسمه ايه ده ... محمدين بيسلم عليك ياتلي في بالي

الأحد، 15 مارس 2009

جديد

لحبيابي واصدقائي المتابعين لمدونتي الصغنونة لسه هفتح ركن جديد بعنوان (ع البسطة ) هتناول فيه شخصيات مبالغ فيها كده زي سعيد اردغانة و كلماتا الحرامي و ممكن تلاقيني جايب في سيرة حد من اصحابك او جايب في سيرة حضرتك طبعا من غير قصد لان الشخصيات هتبقى حقيقية بس هرككز كتير على عيوبها يمكن حد منهم يقراها و ياخد باله ان ده عيب مش ميزة وبعدين هيطلع منك واحد رخم دكه انا عارفة وشايفة ايوا سامعك يالي بتقول اشمعنا ع البسطة متسميها ع السلم طبعا خفيف يا واد هقولك بقا يا سيدي اولا ع البسطة ليه لان حضرتك لو وقفت ع البسطة كده بتاعة السلم عندكوا هتلاقي ان الناس الي فوق مش شايفينك والناس الي تحت مش شايفينك يعني انت حضرتك اوف سايد ولازم تتحسب ضربة جزاء صريحة احم احم احم رحت فين تعالى هنا متهش مني وبعدين متركز عشان متهيس
يعني انا هتكلم عن شخص الي همثله بشخصية الناس الي تحت وهحكيلك عنه انت بقا الناس الي فوق وطبعا انا العامل المشترك الوحيد الي في الموضوع وحضرتك متعرفهوش ولا هو اتشرف بحضرتك وبعدين مضايقنش منك عشان انت بقا رغاي اوي المهم انتظر كده كام يوم عشان تعرف انا بحكي في ايه بالظبط و اسيبك بقا عشان ظهقت منك

سلامووووووووووووووووووووووووووووووووووووز

الأحد، 8 مارس 2009

زيكا يا زيكا

بهدي الخاطرة لصاحب المدونتين الاشعاريزم والمخرج الي هو اعز صديق زيكا حبيب هارتي والكوتش طبعا سبقتني بالحكاية ديه وانا بهديهاله عشان يترفع من معنوياته المحطمة ويا جماعة ده حق الصداقة عليا مش مهم تكون حلوة بس المهم انها طلعت من قلبي و عشان بقالي كتير مدونتش والي شغال عليه لسه مخلص قررت اعمل البوست ده على السريع لصديقي زيكا تحياتي

زيكا يا زيكا
يا عيدان مزيكا
يا صاحبي ياللي عمري ما هنسيكا
ودايما عملك بوليكا
ولا اجدعها ابو تريكة
وععند كمشاكل مع البولوتيكا
ليه زعلان كل ده عشان حلم المسرحية
وعامل مشاكل مع الرقابة المصرية
يا راجل ولا يهمك فداك مليون مسرحية
اكيد انت عارف انه في بلادنا ديموقراطية
حرية وابداء راي و كلها في السجن مرمية
في بلدنا كل المسئولين اونطجية
واكنهم عايشين في بلد تانية
رشاوي وفساد وكله بالملوخية
بطالة و عطالة و بتمشي بالمحسوبية
معاك فلوس تساوي فلوس
وطبعا على كل الناس تدوس
بحبك يا الي اغلى من الكنوز
وقلبك عندي احلى القصور