حكومة اغراق الثورة

مش عايز اكتب ومش عارف اكتب من كتر اللي بشوفه هتكلم عن ازمة الانابيب و الناس اللي هم هم كل سنة بشوفهم في البرامج بتتكلم و بتتذل في الطوابير عشان الانابيب مش موجودة من بعد سيطرة الحزب الوطني و سياسة التجويع اللي لسه مستمرة لغاية النهاردة مرة يتلككوا اصل مش عارف ايه ومرة تانية يقولك اصل الجزائر منعت عننا الانابيب طيب و المرة دي الانابيب خلصتوها ع اللي في التحرير بقيت مخنوق دايما وشايل هم وقرفان و حياتي مبقتش مظبوطة و انا فرحان بده لاني كنت "شئ" تافه يا دوب اكتب كلميتين حزن في مقالة واكمل اكل و اكمل نوم عادي جدا لكن من بعد ما خالطت ناس كتير اوي غلابة بمعنى الكلمة و ناس استنت الفرج من بعد الثورة وناس استنت الحياة تتعدل بعد الثورة و شكواهم لدرجة اني بقيت امل جدا من كلام الناس ومن شكاويهم عشان مبقتش قادر استحمل فبقيت شاب هاند فري احط الهاند فري في كل المواصلات عشان مسمعش مبقتش عايز اسمع مبقتش قادر استحمل شكاوي اكتر من كده .
تحب اكلمكوا عن التحرير واللي حصل فيه والغاز المسمم و الغاز اللي اترش علينا و الناس اللي كنت بشوفهم تموت و الناس اللي باعت واللي خانت واللي طلعت جبانة اكلمك على مين اكلمك على احمد حرارة و نظرة الامل اللي شوفتها في عينه الوحيدة قبل الفقع يوم السبت في ش عيون الحرية

تحب اكلمك عن همومي و عن مشاكلي و عن الشغل وعن اعتقاداتي وعن السياسة و عن الدين و عن الشعر و عن المقالات وعن الاحلام والتاريخ و الاوهام و الطفولة و الامومة و الحنان

الحياة مبقتش قادر اكتبها واطوعها زي الاول اكلمكم اني اخر كتاب قريته يجي من شهر كده كان مذكرات "ارنستو تشي جيفارا"

وان الكتاب اللي قبله كان بن رشد احكلمكم عن الدروس المستفادة منهم طب اكلمكم عن الدرس الاول للشعراوي بسم الله الرحمن الرحيم

اكلمك عن صحابي اللي اضربوا و اتصابوا و اللي اتسحلوا واللي اتفقعت عيونهم عشان نشوف الحرية

قولي بالله عليك اكلمك عن ايه في دول وكل واحد فيهم ممكن اعمل عنه كتاب النتيجة النهاية لكل ده اني مبقتش عارف اكتب كلام زي البني ادمين يوجعك او تحسه لما تقراه قصر الكلام احسن والسلام ختام عشان اكيد فيك اللي مكفيك ومش ناقص ويمكن يكون عندك اكتر من اللي عندي و هتدخل تقولي معلش وانت وانت وانت بجد بتمنى ان محدش يقرا الكلاكيع دي عشان مبقاش سبب في نكد حد

3 سنوات

3 سنين من التدوين الاليكتروني واللي عرفته عن طريق كاتبة و صاحبة مشاعر من الدرجة الاولى و كنيتها نور دلتني ع الطريق و بدأت الرحلة شوفت كتير وقليل و لسه الرحلة مستمرة في عالم الكتابة اتعرفت على كثير من الفضائل وتخلصت من الكثير من الرذائل و مازال التخلص جاري و لكن انا سعيد جدا بعامي الثالث للمدونة و التدوين الالكتروني وما حققته وما رسمت لتحقيقه في القادم

ِشهادة المشير

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس

س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير؟

ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟

ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر ؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب ؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا?

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

شعب مُعدي

توصف شعوب لعالم وتصنف بسِمة غالبة على طباع افراده ومجتمعه فللتذكير مثلا هناك

الشعب السوداني

شعب كسول جداً حتى انه من فرط كسله يستخدم في جلبابه شكل المربع عشان لو لبس الجلبة من ورا او من قدوم يلاقيها معدولة و بيحط جيب شمال فدائما نجد جيب في قفاه .

الشعب الهندي

شعب سلمي لابعد حد بعيداً عن الافلام الهندي اللي بيستخدموا فيها اكشن من نوعية عفى عليها الزمن واسرف الى انهم شعب سلمي فالشعب الهندي ظل يناضل ضد احتلال يسرق ويغتصب و يحرق ويقتل بالسلم ولم يستخدماو العنف الا فيما ندر .

الشعب المصري

ااااه هنا تكمن المشكلة هتلاقي هنا قمة الاختلاف والتناقض المباشرة طيب زي كمال ابو رية و شرير زي غسان مطر وعصبي و مزاجنجي وبيضحك ونكدي وبطل و خانع و مقدام و خوّاف

الشعب المصري معروف بالعدوى يعدي بعضه البعض وهنا نضرب الامثال لعدوى الشعب المصري

ساعة الماتشات

كل الشعب تلاقيه بيتفرج وبيتابع حتى اللي ملهمش فيها ويفضل يتكلم في التكتيك والتغييرات و ده بدل ده كله ساعة الماتش بيبقى محمود الجوهري و ابو تريكة و الخطيب و حسن شحاتة في قلب بعض

ساعة الثورة

بمجرد ان الناس شافت الشاب اللي وقف ادام المدرعة انتقلت هنا عدوى البطولة الى الشعب والشباب باكمله فرأيت اناس يقدمون على بطولات اكثر من شاب المدرعة و الكل نفر الدم في عروقه يعني هو الواد ده ارجل مني فرأينا ما رأينا من بطولات فائقة يوم 28 ويوم موقعة الجمل

برده ساعة الثورة

بعد خطاب المخلوع عمو حوستي يوم 1 فبراير واللي قال يحز في نفسيتي و اللي قال فيه عايز اموت على ارض مصر الشعب بيتعاطف معاه والناس تاني يوم ومع التعتيم الاعلامي كله بيقول خلاص بقا كفاية حرام الراجل كبر ده عجز وهنا ظهرت آفة انا اسف يا ريس

برده ساعة الثورة

بعد موقعة الجمل وبعد قتل القناصة وبعد الانتقال من التلفزيون الملاكي الى الجزيرة والعربية و اون تي في الكل اصبح بطل وعايز بلطجية يجوا عشان يفش غله فيهم ولذلك رأينا مليونية يوم 4 فبراير تأن منها شوارع مصر اكثر من 6 ملايين مواطن محشورين في ميدان التحرير وميدان طلعت حرب وسعد زغلول و اماكن كثيرة

تاني يوم الثورة

ميدان التحرير تم تنظيفه على اعلى مستوى "تم لحسه بالسنتنا " فخرجت الفكرة من هنا وكل بقا بينضف الشوارع ويدهن الارصفة وعلم مصر ييزن كل البيوت و الان يا حسرة على الشوارع

بعد الثورة بشوية

الكل راغب في الاستقرار و في دفع عجلة الانتاج وعشان البورصة ما تتهزش والبعض لا يعرف ما يردده ما المقصود

العيّنة بيّنة

دخلت المترو كان في زحمة وواحد بدأ يهاجم الثورة والمعتصمين و الحاجات اللي اتعودنا عليها دي دايما ولاقيت اتنين بدأوا يتكلموا والناس بتبص عليه وهتبدأ تشارك في وليمة الثورة

عندما تدخلت بالرد على ما قاله و فندتهوله بدأت الناس تعود الى ادراج الثورة سالمة واصبحت مع الثورة

الشعب المصري بيحب ركوب الموجة ومع الرايجة وهي احدى سمات الطبيعة البشرية للمصريين وهو شعب العدوى بمجرد ظهور حالة واحدة فيه يتعرض الشعب كله الى عدوى ولكنه شعب بيمل بمسرعة فبيرجع لعادته من جديد

اذكر ملامح الموجة التي رأيتها :D

ازمة ميكروباص!!

ايه ده هو فيه ايه

الميكروباص كله في بؤ واحد نطق الكلمة دي وبدأت بقا اسئلة من نوع مين دول ؟؟ هو فيه زحمة ليه ؟؟ هو فيه ايه ؟؟ ولا واحد عارف فيه ايه ؟ بدأ الموضوع بشوية فتايين يا عم دول بلطجية ؟؟ واحد من ورا : لا لا يا جدعان دول بتوع الحزب الواطي؟؟ رديت بعد مجموعة هذي : يدول بتوع مخيم السلام

الحكايةان

ده كان اول يوم لاعتصام اهالي مخيم السلام للمطالبة بشقق ام ماسبيرو ومعنى ان فيه اعتصام ادام ماسبيرو يعني الطريق تحرير امبابة مقفول وبما اني كنت في التحرير فصباح الاذى عشان اوصل لامبابة طبعا العملية كانت خنيقة واللي يشتم واللي يلعن واللي يسب ولما جيت اقولهم الناس معاها حق في المطالب بس ميقفلوش الكورنيش لانهم كده كده قافلينه مش عشان كثرة عددية لا ده عشان هو كده

الفكرة

بدأت بخروجنا من موقف عبد المنعم رياض متجهيين لناحية ماسبيرو ازاي بقا نوصل ونعدي بالميكروباص من خلال المعتصمين اللي قافلين الطريق السواق سلك طريق العكسي على اساس ان ده هو الصح لكن وقعنا في مشكلة ان الطريق رايح وجي مقفول بدأت الناس تتخنق وتلعن وتسب في اللي قاطعين الطريق و في السواق عشان داخل عكس اخويا قاله : اطلع الكوبري بتاع اكتوبر وانزل الزمالك قام واحد قال من ورا كده من الناس اللي عمالة تشتم قاله : انزل العجوزة يا اسطى كنا وصلنا ادام نزلة الزمالك عند العوامات وورا الماريوت اول ما نزلنا يا دوب 10 متر كده لاقينا الشارع مقفول على اخره المهم سنة سنة وواحدة واحدة لاقينا ينفسنا ادام كوبري 15مايو ممكن ننزله وناخد حتة عكس من عند الوكالة ونبقى كده فادينا الاعتصام و عدينا الناحية التانية بسلام

و ممكن نكمل في الزمالك ونطلع عند الكيت كات بس اليوم كان الخميس والزمالك الخميس مفيهاش موضع قدم اتشاورنا وقلنا انه يطلع الكوبري 15 مايو وياخد حتة العكس دي عشان نوصل للهدف بتاعنا وهو عبور الاعتصام يا دوب الراجل نزل من عند 15 مايو وبقينا على كورنيش التحرير في الاتجاه اللي رايح التحرير المفروض نلف بقا لاقينا زحمة اوي وبدأت الشتيمة واللعن و ينعل ابو الاعتصامات ودي ثورة مش عارف ايه و دي ناس مش عارف ايه المهم اخترقنا الزحمة وعدينا كل ده وبقينا في الطريق السليم والطريق ماشي

دلوقتي

كل اللي ورا عمله عبط وبصيت لاخويا وقلتله: دلوقتي نشرب نخب الانتصار

الزتونة بقا

1*كان عندنا مشكلة وهي اننا ازاي نعدي من الاعتصام عشان نوصل لامبابة بكده كان فيه هدف قريب وده لازم نتغلب عليه عشان لازم نوصل للهدف التاني

2* لو سمعنا الكلام وفضلنا نشتم في السواق كان هيخرج عن شعوره و هيفضل يتخانق معانا وكنا احتمال نبات قهراً في القسم

3* لو كان كل اللي في الميكروباص اتخانقوا مع بعض و قعدنا نشتم في بعض ونسينا الهدف وهو اننا نعدي

تخيل معايا كده

لو كل واحد فينا او كلنا بعدنا عن التوك شو وبدأنا نحل في مشكلة او ندور على حل للمشكلة بدل اما نقعد نتخانق ممكن رأي واحد بس فينا هو اللي يمشي ممكن يوصلنا او ممكن يغرقنا لو وصلنا كتر خيره لو غرقنا نقله لا نعيد من تاني

**

تخيل تاني كده

لو كل الناس اتفقت انها عايزة تروح المكان ده و بالوسيلة دي وكلنا هنفضل ورا الوسيلة دي عشان تنجح باي شكل

**

معلش تخيل تالت كده

لو فعلا كل واحد مدعي سياسة ومدعي ديموقراطية ومدعي حوار"حمار " قعدوا اتكلموا او قعدنا "شباب" من مختلف التيارات واتحاورنا مش اتخانقنا

لازم بجد عشان نخرج من الزنقة دي لازم نعمل حالة حوار

مش حالة حمار

ملحوظة **الحكاية بجد مش هزار والدرس بجد مش هزار ويا رب نخرج من حالة الحمار

أُمّة جَهلت باقرأ

خُلق الانسان ليكون رسالة الله على الارض ففي قوله تعالى تفسير لذلك المنطق وحوار الله سبحانه وتعالى مع الملائكة في قوله تعالى بسم الله الرحمن الرحيم" وَإِذْ قَالَ رَبُّكَ لِلْمَلاَئِكَةِ إِنِّي جَاعِلٌ فِي الأَرْضِ خَلِيفَةً قَالُواْ أَتَجْعَلُ فِيهَا مَن يُفْسِدُ فِيهَا وَيَسْفِكُ الدِّمَاء وَنَحْنُ نُسَبِّحُ بِحَمْدِكَ وَنُقَدِّسُ لَكَ قَالَ إِنِّي أَعْلَمُ مَا لاَ تَعْلَمُونَ {30} وَعَلَّمَ آدَمَ الأَسْمَاء كُلَّهَا ثُمَّ عَرَضَهُمْ عَلَى الْمَلاَئِكَةِ فَقَالَ أَنبِئُونِي بِأَسْمَاء هَـؤُلاء إِن كُنتُمْ صَادِقِينَ"

وهنا الله سبحانه وتعالى يتحدث مع ملائكته في قضية خلق الله للانسان وان الملائكة قالت لله عن الانسان انه سيفسد في الارض و يسفك الدماء ونحن افضل منه بالتسبيح وبالتقرب اليك وكأنهم يقولون لله تعالى نحن افضل ما خلقت بالعبادة لماذا خلق الانسان ؟ فهنا جاء رد الله سبحانه وتعالى "وعلّمَ آدَمَ الأسْمَاء" اي ان الله خلق ادم عليه السلام ثم علّمه الاسماء فأصبح بالعلم النافع اعلى مرتبة من الملائكة وهنا تأتي قضية العِلم كأولى رسالات الله للانسان بالتعلم واولى رسالات السماء في القران الكريم لسيدنا محمد صلى الله عليه وسلم فكما في الرواية الشهيرة ان سيدنا جبريل عليه السلام نزل الى سيدنا محمد في غار حراء وهو يتعبد فأقرأه السلام ثم قال له :اقرأ فرد الرسول صلى الله عليه وسلام :ما انا بقارئ

فكرر عليه سيدنا جبريل رسالة السماء :اقرأ فقال سيدنا محمد ما انا بقارئ ثم في الثالثة كرر عليه الرسالة سيدنا جبريل فقال صلى الله عليه وسلم : ماذا اقرأ

فردد عليه سيدنا جبريل اولى ايات القران التي حملت بين اياتها وفي ثنياتها رسالة الله للارض واهلها ورسالته من خلق الانسان فقال الله تعالى " اقْرَأْ بِاسْمِ رَبِّكَ الَّذِي خَلَقَ {1} خَلَقَ الْإِنسَانَ مِنْ عَلَقٍ {2} اقْرَأْ وَرَبُّكَ الْأَكْرَمُ {3} الَّذِي عَلَّمَ بِالْقَلَمِ {4} عَلَّمَ الْإِنسَانَ مَا لَمْ يَعْلَمْ {5}"

فهنا الله سبحانه وتعالى يقول ويُعلّم الانسان ان يقرأ باسم الله وهنا تأتي ثاني رسالة بعد القراءة ان الانسان عليه ان يتعلم ما يفيد لكي يكون مباركاً من الله سبحانه وتعالى ذلك العلم فكم رأينا ان البارود وهو يمثل قمة العلم قد استخدمناه في الحروب وبازهاق الارواح البشرية كما تم استخدام العلم في القنبلة النووية التي تقتل الملايين وتبيد الناس دون وجه حق و دون وجه ذنب فالله لم يكن هذا مبتغاه من العلم ولكن اراد الله ان يتعلم الانسان لكي يفيد به البشرية ولكي يستفيد منه الانسان في تعمير الارض

وهنا تأتي القضية الثانية من سورة العلق" خلق الانسان من علق " فهنا الله ينزل الوحي على سيدنا محمد ويقول له في ثاني اية من القران تلك القضية الخطيرة مع وضع الاعتبار ووضع في الحسبان تلك البيئة الجاهلية التي لم تكن بها حضارة كحضارات الاغريق او المصريين القدماء او البابليين فلم يكن العلم يشق طريقه في تلك البيئة الجاهلية

وتأتي رسالة اخرى في قوله تعالى "وعلّم الانسان ما لم يعلم " وهذا حق كيف كان يعرف الرسول وهو الامي الكريم بان اصل الانسان كان نطفة ثم علقة فالعلقة هنا هي المرحلة الثانية من تكوين الانسان في رحم امه فكيف هنا الله سبحانه وتعالى ضرب المثل للانسان بان عليه التعلم فليس مقتصر العلم على علوم الدين فقط ولكن مرتبط بكل علم يفيد الانسان والانسانية ويساعد الانسان في تدعيم رسالته في الارض بالتعمير .

فنصل بهنا الى غايتنا والى هدفنا بان الانسان رسالة الله على ارضه و رسالة الانسان هي العلم والتعلم فيما يفيد نفسه ويساعد بتقدم الانسان غاية في التقرب الى ربه فالله لن يسأل الانسان عن رأيه السياسي ولا عن رأيه في الاهلي والزمالك ولكن سيسأل الله الانسان عن رسالته التي انزله الله تعالى وخلقه بسببها هل اديتها ام تركتها ؟هل تعلمت ام جهلت ؟ هل نفعت بعلمك الناس ام ضررت ؟ هل نفعت الناس في شغلك ام كسلت ؟ فالعلم هنا فريضة واجبة مثلها كالصلاة والصوم و التقرب الى الله فالانسان الجاهل يضر برسالته اكثر من ضرر الانسان بعدم صلاته مع اهميتها بالقطع والوجوب عليها .

" لن اكن متحدثً عن الاسلام فالاسلام اكبر من ان يتحدث عنه جاهل مثلي ولكني قرأت وفهمت فهذا ما فهمت قد اكون مصيب وقد اكون اخطأت "

متلاصقة ستوكهولم

هذه الحالة النفسية

التي تعرف بمتلازمة ستوكهولم التي ظهرت في عام 1973 في السويد بعد ان اقتحم ملثمون البنك في سطو مسلح واستمروا بالبنك مع رهائنهم لمدة 6 ايام وبعد ان تم فك اسر الرهائن تعاطف الرهائن وبدأوا بالدفاع عن خاطفيهم و هو حالة تعاطف " المجني عليه مع الجاني "

ايوة بالظبط كده انا قفشتك وانت مستغرب اوي من كلمة تعاطف المجني عليه مع الجاني ومتستعجبش اوي عايز تشوف المتلازمة دي انزل بس الشارع و اركب ميكروباص ونقيه يكون هيمشي مسافة كبيرة واتكلم عن الثورة بس

في اثناء الثورة تلاقيه بيقول عيب ده راجل كبير اد ابوك "يا عم انت ابويا في البيت وعيب لما تدعي على مامتك حاجة زي دي"

بعد اول خطاب ما خلاص بقا ارجعوا عشان اقتصاد البلد وهو قال هيصلح سيبه ده برده رئيس يعني "حضرتك ده بقاله تلاتين سنة بيكدب كدب الابل"

بعد موقعة الجمل ارجعوا بقا عشان خايفين عليكوا وكفاية الشهداء اللي راحوا ده ممكن الجيش يضربكوا

بعد تاني خطاب ملكوش حجة كده بقا هيصلح كل حاجة و مشي حبيب العادي وكله هيرجع تمام "امشي ياض من هنا بدل اما اضربك"

بعد التنحي خلاص ارجعوا بقا عشان البلد تمشي واهو مشي بقا يا جدعان والميدان موجود هتروحوا منه فين يعني " نفس الناس اللي اعترضت على نزولنا يوم 8 يوليو"

قابل بقا يا معلم هتلاقي كلام من اللي هو بقا

هما بيعملوا ايه ؟

عايزين ايه .مش خلاص خربتوها؟

فين ايامك يا مبارك "الجملة دي بتتقال على استحياء شوي "

انت مسمعتش الشعراوي بيقول الثائر الحق ؟

لو كنت زي حلاتي غلبان من اللي اتضربوا في التحرير و اللي شافوا يوم منيل بداية اني افتكرت يوم الجمعة سواق الميكروباص امن دولة و بدأت اشك في اللي جنبي لانه رايح مسجد الاستقامة و بدأ يكلمني و نهعاية من انك تغمض عينيك عشان ترتاح من الضغطك اللي عليك متشوفش غير اسود في اسود كلهم عساكر امن مركزي

وكنت غلبان زي حالاتي من الناس اللي اتمرمطت واللي حلفت لتموت في سبيل تراب البلد دي و اللي يوم10/2 حس انه نفسه يموت بدل اما يسمع خطاب مبارك وهو بيقول "سأظل..."

ومن الناس اللي اتجننت يوم 11/2 بفرحة هستيرية خلتك تنط فوق صاحبك او تحضن واحد او واحدة جنبك جامد اوي وتقوله انتصرنا و تسجد لربنا

ولو كنت من الناس اللي نامت ع الرصيف واللي خسرت اصحابها عشان الليف ي التحرير

او كنت من الناس اللي مدقتش النوم عشان فيه بلطجية جايين وبيعدي عليك واحد بفيزبا يقول كدا "ايوة ما هو عدا عليا انا كمان "

اذا كانت هناك في السويد متلازمة فهنا في مصر سارت متلاصقة بيحث انها جزء لا يتجزأ من الانسان الستوكهولمي

لو عديت بأي مرحلة من دول واستمريت لغاية النهاردة يبقى استحالة هتسكت على اسئلة المتلاصق الستوكهولمي ده لانه مش مطلوب منك ابدا انك تسكت على واحد كنت هتضيع عمرك عشانه وهو بيقول انتوا عايزين ؟

وممكن بقا المرض ده يكون متوغل بداخل انحاء الانسان الستوكهولمي بحكم عِشرة 30 سنة اذا كان المرض الاصلي ظهر في 6 ايام فما بالك بقا ب30 سنة واحد مذلول مطحون مخنوق محني مركوب طول السنين دي وانت جاي يا عيل انت تقوله قوم انت كنت بتضرب على قفاك ايش فهمك انت ؟ ده انت لسه صغير ومتركبتش يعني

المريض ده بيخاف يفتح عينيه ليلاقه نفسه ضعيف اه مهما كانت الشخصية ضعينة الى انه يرفض بالضعف

وفيه مريض تاني بيخاف يعترف فبيظل عابد للطاغية على طاغوته يعني من الاخر هو مصدق وعايز يصدق انه كان كويس وان كل ده وهم

اول ما تلاقي المريض ده اوعى تسكت لان الشعب المصري معروف بالعدوة بعد موقعة الجمل الشعب كله بقا ثورجي و بعد التنحي الشعب كله بقا توعوي و بعد الاستفتاء الشعب كله بقا قانوني و ساعة الماتشات الشعب كله بيبقى المدير الفني وابو تريكة في نفس ذات الوقت

فحضرتك بقا لو سكت على المريض الستوكهولمي ده هتلاقي الحالة انتشرت في الميكروباص او يكون ربنا بيحبك وتبقا في مترو ساعة ضهرية هتلاقي الناس كلها عمّالة تتكلم على الثورة

وخد بس انت موقف المدافع و المهاجم للثورة وفكرهم كده اه "ان الذكرى تنفع المؤمنين" بقوله تعالى انا مبألفش كلام يعني هتلاق حالة العدوة دي بقت منتشرة في المكان اللي انت واقف فيه والكل بدأ يتكلم معاك

ايها المريض الستوكهولمي من بتوع احنا اسفين يا ريس لما نأسف يوماً على اننا متركبناش صح او على اننا متظلمناش او ممتناش في عبارة او من فوق كوبري او في قطار الصعيد او في مسرح بني سويف او ممتناش في مستشفى اتقطع الكهربا عنها بالساعات

ايها السليم من متلاصقة الستوكهولم لا تعجب من رجل ظل محني طول 30 سنة ظل يطأطأ رأسه ويتضرب على قفاه حتى جيت انت بجلالة قدرك ورفعت

رأسه فوووووووووووووووووق لانه مــصـــري

بني سعود ..

منذ اعلان تأسيس بلاد الحجاز تحت مسمي المملكة العربية السعودية وهي لا تمت باي صلة لبلاد العرب فهي تعمل دائم وفق هوى ال سعود وكان ذلك عام 1932 م.

البداية

كانت مع التأسيس للدولة المقامة حديثة وبزوغ نجم ال سعود رأت بريطانيا انه الجواد الرابح في تلك المرحلة بعد افول نجم الاشراف واكتفاهم بمنزلتهم الدينية فقط وبدأت بريطانيا كعادة الثعلب المكار في اغواء عبد العزيز بن سعود بصداقتها ومعاهداتها التي لا تخرج منها بريطانيا الا فائزة بكل الامتيازات المشروطة والمقيدة للجانب الاخر .

مع قوة عبد العزيز بن سعود في شبه الجزيرة العربية بدأت بريطانيا تأخذ الحيطة والحذر من ذلك الشهاب المنطلق فبدأت في استمالته ثم ارتبط مع بمصالح ثم بدأت في تقويده وتقيده باتفاقيات مع جيرانه يتحدد عليها مصالح بريطانيا في هيئة مصالح السعودية فعاشت السعودية تفتقر الى اي موارد تستطيع قيام دولة حرة فبدأت في شكل منح من بريطانيا لال سعود لكسر عينهم واجبارهم على توقيع الاتفاقيات بطيب خاطر ثم انتهت فالبحث عن الكنز الاسود في اراضي المملكة كاملة فأصبحت منذ ذلك الوقت دولة غربية باحتواء بريطانيا للاقتصاد البترولي في السعودية

بدأ الشارع العربي يتحرك نحو الثورات لزوال الانظمة العربية الفاسدة ربيبة الغرب وذلك بعد ان انكشف كل شئ بعد حرب 1948 وهنا اتى انقلاب الجيش المصري على الملك فاروق واخراجه من مصر في 23يوليو 1952 لتكون بذلك رائدة الثورات في العالم العربي ثم ساعد في ذلك الدور تولي جمال عبد النار لموقع الريادة بعد عزل الرئيس محمد نجيب في1954 ومن هنا بدأ عبد الناصر بفكره القومي العربي فبدأت عام 1962 حرب اليمن بين المملكة المتوكلية اليمنية و الجمهورية العربية اليمنية و من الاسم الثاني تضح معالم الوفاق بين هذه الفصائل وبين فكر عبد الناصر العربي فبدأ بمساندة اليمن من راديو اذاعة العرب ثم تحول ذلك الى ارض الواقع بمساندتهم بلوءا مصحوب بالطائات ولكن هذا لم يكن كافياً في مواجهة ملكية اليمن و مع خوف السعودية من المد الثوري الناصري بدأت في تدعيم الجبهة الملكية بالجيش السعودي على حدود اليمين لتدعيم الامام احمد بن يحي ضد الظباط الاحرار اليمنيين ثم انتهت الحرب اليمنية بانهزام الملكية امام الجمهورية اليمنية و احتضنت السعودية الامام احمد بن يحيي ومن هنا كان العداء بين ال سعود وعبد الناصر فلم تكن العلاقة ابدا على ما يرام فنظر عبد الناصر اليهم كديكتاتورية ونظام ملكي مناهض للاصلاح والقومية العربية.

هذا الاحتضان للامام احمد بن يحيي و ابنه بدر يشعرنا بأن هناك شئ ما مشترك بين ثورة اليمن وثورة الياسمين ثورة تونس 2011 حيث هي الدولة الوحيدة التي قبلت احتضان زين العابدين بن علي رئيس تونس الهارب والمخلوع بعد انباء عن هروبه لفرنسا ثم الى دبي ثم الى اكثر من مكان الى انهم كلهم تم رفض طلب بن علي في اللجوء السياسي اليها وقبلت السعودية بذلك وقبل ال سعود احتضان مجرم ارتكب في حق شعبه الكثير والكثير من الجرائم و ارتكب في ثورة الياسمين مذابح لابناء شعبه الذين طالبوا بحرية وعيش كريم

علينا ان نسأل انفسنا

لماذا السعودية احتضنت الامام احمد بن يحيي في خمسينات القرن والان تحتضن بن علي ؟

هل اقامت السعودية ما تعهد به عبد العزيز بن سعود مع الامام محد بن عبد الوهاب باقامة شرع الله ؟؟

الان في السعودية يحاكم كل من يتكلم وتعذيبه بابشع الصور؟

لماذا صمت الرئيس المخلوع حسني مبارك اما جلد ال سعود لطبيب مصري لم يرتكب اي ذنب؟

تم تعذيب مواطن لان هاتفه يحوي صورة بن لادن؟

ماهية الاجندة التي تعمل بها السعودية متمثلة في ال سعود وصداقتها مع دولة استعمارية قديما وهي بريطانيا وصداقتها الوطيدة الان بامريكا وصيانة مصالحها في الشرق؟

علينا ان نفرق بين ال سعود وسعوديتهم و بين بلاد الحجاز المكرمة بمكتها وبقبر الرسول قلى الله عليه وسلم

فتلك بلاد وتلك بلاد البعد بينهم مسافات وأزمنة فهناك في ال سعود الشرع يحكم على الضعفاء وعلى من يتفوه في حين يترك الكبار واما عن تلك البلاد فاقام فيها المصطفى شرع أعمى لا يرى لذلك لا يفرق بين وزير وبين خفير فرحمة الله على بلاد وعلى شعب قبل الهوان قبل الانتساب الى فرد واحد

زقزقة تحرش

في البداية

انا مش عارف التحرش ده جالنا منين حاسس انه كوكب فضائي ونزل علينا في مصر ؟ يعني فجأة كده لاقينا الناس بتقول ايه ده ده واحد اتحرش بواحدة ايوة حضرتك يعني ايه تحرش اصلا ؟ يعني يا عم ضايقها ؟عاكسها يعني ؟لا مد ايده ؟ وضربها ؟ ولا وعمل "زقزقة عيال" يا نهار ابوه اسود وهي عملت ايه ؟ سكتت عشان مؤدبة!!!!

دي كانت اول مرة

اسمع فيها عن حكاية التحرش تقريبا كان بداية الالفية و معرفش ده ليه علاقة بشاكيرا ولا لأ وبعد كده بدانا نسمع تدريجيا عن .

"وجريت وراه و رحت ضرباه موقعاه"

ده كان رد فعل واحد زميلتي في ثانوي رداً على ان حرامي سرق سلسلتها وطبعا الراجل ده الله يرحمه واتمسك .

سفاح المعادي !

ايوة يعني بيعمل ايه ؟ بيعور البنات في ال..." زقزقة شباب" ايه ده يا عم وازاي بيعمل حاجة زي دي في الشارع ؟ اصله بيبقى راكب موتوسيكل وبيطير طب والناس والحي ومبيتسرخش مفيش اي اغاثة لأ..

سعار جنسي في الشارع المصري

هكذا تفوهت منى الشاذلي ناقلة لي ما حدث في شارع جامعة الدول العربية عبر شاشة برنامجها يومها كدت ابكي دماً على ما حدث وكنت حينها في دولة الامارات العربية الشقيقة بان شباب كثير قد تحرش بثلاث بنات في الشارع علناً دون مجيب حتى تجمع شباب المحلات واخرجوهم من قبضة الحيوانات .

حينها عرفت

ان هناك في الامارات رقم هو 911 وهو الاغاثة السريعة او شرطة النجدة او "انجاد" كما يُقال هناك وهنا علمت ان الحكومة وضعت حرية المرأة و اغاثتها فوق كل القوانين وفوق كل الحدود هنا في الامارات المرأة كما حمى الملك اياك وان تقترب منه فستنال حينها اقصى العقوبات والغرامات بل وعلمت ان الجرائد تشهّر بهذا الرجل الذي ضايق امرأة على صفحات الجرائد ويتم وضع اسمه بالكامل و صورته وعمله في الصفحة

في مصر قديماً

عندما كان يعاكس شاب فتاة ويُمسك به كان بيتحلقله زيرو عشان الناس تعرفه وتبقى معلذمة عليه

.......

في كل هذه الحكايات

نخرج ان رد فعل الفتاة تجاه المتحرش هو بمثابة جرس انذار لان يقترب منها اي شخص فعندما تسكت يكرر الحيوان فعلته في فريسة اخرى اما اذا لقنته درساً في فنون الكيك شبشب او فنون كيف تضرب بالكعب العالي او ناولته من المنقي يا خيار حينها سيحرم تمام وهنا لو القينا نظرة على البنات اللاتي يتحرشن بها الشباب نجدها فتاة يبان عليها انها مؤدبة اما اذا كانت فتاة بعباية سمراء طابع عليها الحي الشعبي فانه لا بيعاكسها ولا بيتحرش بيها خوفاً من لسانه السليط

ومن زقزقتي

بقولها "لسانك حصانك" ويا ريت كمان كل البنات " تسترجل وتضرب بيريل" عشان تضرب المتحرش

..........

نجد هنا التشهير

علامة مميزة للمتحرش وهو " بمثابة يادي الجرصة ام حناجل " فيعرف ويتعظ من تراوده نفسه للتحرش ان لا يتحرش

..........

القانون هو الحل

في كل البلاد التعدي على الخصوصية كما انتهاك حمى الملك عقوبته مغلظة و خصوصا ان كانت امرأة

نفسي اعرف مين اللي زق التحرش في مصر ؟؟

وفي الاخر بقول للبنات والشباب استرجلوا بعد الثورة واضربوا اي حد بينتهك حرمة اي حد سواء بلفظ او بلمس .

بلوجي حبيبي

احلى حاجة في هجرة البلوج بتاعي اني لما رجعت ابص عليه ملقتش حد بيتابعه وده بيديني فرصة ذهبية للكلام بكل حرية واباحية لان كده كده محدش هيدخل ولا حد هيعرف عنه اي بوست بن كلب هع هع هاااااااااااي ايوة ما احنا اللي غلبنا الشرطة و قبضنا ع الجاسوس । الحياة خلاص بقت لا تطاق كل حاجة فيها مزيفة مشاعر مزيفة وضحك مزيف وسعادة مزيفة حتى انا بحس اني بضحك على نفسي باني عم الواثق بقا الفيلسوف المثقف المؤرخ الشاعر الكاتب وانا يمكن فعلا اكون بحب الكتابة بس اكيد مش تسعميت حاجة في بعض ما انا مش ماجنزر مثلا
بس انا مؤمن بقلمي وبكتابتي وبحس انها بتوصل للناس و انا بكتب مش لغرض الكتابة ولكن عايز اقدم رسالة للناس । انا بعتبر المقال اللي يقراه الواحد ويخرج منه زي ما دخل بعتبر الكاتب بجمون كبير لانه مقدرش بثقافته "ده مع التسليم انه عند الكاتب ثقافة " يوصل المعلومة للقارئ بشكل بسيط । بس انا هنا مش عشان اقول لنفسي عن الكتابة انا هنا عشان اقول اني بجد محتاج حضن حنين كده الواحد يترمي فيه بكل قوته ويدفس راسه و يحلم ويناااااااااااااااام و يشيل عنه هموم هو ميعرفش مصدرها من انهي حتة الواحد وحشه احساس انه يحب ويتحب بس انا عمري ما هحب حب الاحتياج للحب بس انا بيني وبين نفسي" ما هو محدش بيقرى الكلام ده " بيني كده شكلي هقع واقف قريب او بدأت اندب في حب واحدة كده بيني وبين نفسي برده فيها كده كل حاجة على بعض حلوة مفيهاش عيب كده "اكمن مراية الحب عمية " عموما بقا اانا نزلت اتخانق كده حسيت اني خرجت الشحنة اللي جوايا بس الحمد لله الخناقة سليمة كانت عبارة عن بؤ الواحد ظرفه بعصبية و خلص نفسه من طاقات كتير وده بقا اللي واحد بتوحشه الرياضة عشان كده بيطلع فيها الغل كله بيروح صافي كده زي البفتة البيضة اينعم الواحد خلال خمشراشر يوم بيبقى شبه البغل وبيحس انه فيه قوة كده زي الفل بس بردخ بيبقى الواحد مفيهوش حيل او ملهوش نفس يتخانق
عموما قشطة بقا سلامو عليكو

نـــــــور

يمكن المرة دي هبعتلك وانتي مش هتشوفي الرسالة غير كل مرة لما كنت بكلمك كنت بلاقيكي اول واحدة تشوفيها وتفهميها و تقري مغزاها دلوقتي افتكرتك بعد السنين دي كلها معرفش ليه حسيت انك حواليا معرفش ليه بالذات في الوقت ده
البعد بينا كان قدر يمكن عارف انك بعيدة عني ويمكن المسافات بينا بلاد وبلاد بس القرب في لحظة شاردة بييجي اوام والمرة ي بكتبلك وعارف انك لو قرتيها هتفهمي كالعادة بس المشكلة المرحلة الّي هي ماذا بعد اما تفهمي الرسالة ؟ على فكرة بحب اشوفك وانتي مبسوطة جدا ولما بتكتبي حاجة بحسك فيها يمكن مبرضاش اعلق عشان اان بحس بحااجات يمكن متحسيش بيها او يمكن مبقاش ليها لازمة انها تتحس دلوقتي بس صدقيني انا بكتبلك لانك وحشتيني فعلا وعايز اكتبلك واكلمك فملقتش طريقة غير في المكان الي اتبنى على اديكي وكان ليكي الفضل عشان ابقا في الى انا فيه او بمعنى اصح في الي انا رايحله تشجيعك و حماسك اثر فيا اوي
تفتكري بعد كل ده هتفرحي لو شوفتيني اسمحيلي اجاوب بدلا عنك لمرة واحدة هتشوفيين طيف
نفسي مرة اسمع صوتك ومن غير ما نتكلم مش هنطق بس مجرد ان اسمع صوتك
او اشوفك وانتي معاه حتى او اشوفك لوحدك صدقيني استحالة هزعجك او هعمل حاجة تضايقك بس اشوفك
دي مجرد رسالة في الاول والاخر ممكن تبقى لمن شاف ولا من دري بيها
وهتفضلي في قلبي سر
مفتاحه معاكي
يمكني رمتيه
او خبتيه
يمكن رمتيه للبحر
لو شوفتي رسالتي متتكلميش او تنطقي لان كل كلمة محسوبة ليكي او عليكي ومحبش اخليكي في موقف محبكيش تبقي فيها
اعتبيرها مجرد اوهام