انا عشوائي …..ولكن
في دنيتكم يا سادة مليش اماكن
عشان دنيتكم بالاماكن
الي راس ماله فيلا ولا حتى قصر بالجنانين
وانا عايش يا دوب في شقة
ويمكن نعيش في الكباين
انا عشوائي ….و ساكن في مناطق شعبية
دور عليا في امبابة او السيدة و المنشية
او يمكن تلاقيني تحت صخرة مرمية
من فوق جبل الدويقة
وقعت على دماغي ودماغ العيال والولية
انا عشوائي ….ولكن بنظام
علموني اهلي للكبير احترام
وللصغير عليا شوية طبطبة وحنان
ولو عارضت كبير اعارضه بدون صدام
اصلهم عيلتي و عوايدهم مدياني الامان
انا عشوائي …..ومش قضية
ساكن في مناطق قالولي عشوائية
طب ازاي؟؟ والحكومة معترفة بيا
بدفع ضرايب على شوارع غير ادمية
ولو يوم غلط ورحت مستشفى ياخدو حباب عنيا
طب ازاي عشوائي ومعايا بطاقة قومية
واسمي يا سادة ينجحكم في الجداول الانتخابية
لو كانت شورى او شعب او حتى رئاسية
انا عشوائي ….وعندي ارض زراعية
ونبت ارضي يا سادة يحرم على الجماعات الارهابية
انا نبت ارضي يا سادة الشيخ شريف
حافظ القران الكريم
و11 الف من الاحاديث النبوية
وهتعجبوا لو عرفتوا ان عنده من السنين عشر مية
انا عشوائي ….وعندي ارض خصبة طينية
انا نبت ارضي خرج محاسبين ومحامية
واصحاب مناصب دبلوماسية
او حتي شركات هندسية
انا نبت ارضي يا سادة مقاولين وفوعلية
ده نبت ارضي يا سادة فين نبتكم
يا اصحاب الاراضي الكيماوية
انا عشوائي ….وغنايا ليه قضية
ولكل كلمة معني وحكاية واغنية
واسالوا عبد الباسط ودرويش وعدوية
ومطلب وكارم واسامي تانية
والحاج امين صاحب القصائد الشعرية
انا عشوائي ….ولكن عايش في سلام
صاحبي مسيحي ولا دينه الاسلام
متفرقش معايا مايكل من عيسي او عبد السلام
كله بيصحي وينام
ومعانا تحس بالامان
عموما ان عشوائي ولكن بنظام
ومافيش بيني وبين الحكومة صدام
اصل انا عشوائي واساله عني النظام
هناك 4 تعليقات:
حلوه اوي اوي يا عمرو :)
تسلم ايديك
الحقيقة كلمات رائعة ومعبرة جداً
دمت بكل الود
كيفك ياعمرو
ليك وحشة والله
ايه الغياب دا
هي كل الناس غايبة زيي ولا ايه
يارب تكون بالف خير
كلماتك معبرة جدااااا
وبقيت بسمع كتير عن العشوائيات الفترة الاخيرة ربنا يفرجها عليهم
دمت بحفظ الرحمن
hager za3bal
ربنا يخليكي ويكرمك ويديكي على اد نيتك
تسلملي يارتك
صدى الصمت
اشكرك على كلامك واهتمامك
نوارة
والله كانت مشاغل وانتي كمان ليكي وحشة طبعا اذ غاب القمر ايش تسوي النجوم في السما
تحياتي
إرسال تعليق