مصر الشقيانة

يا مصر ياللي محبوسة في زنزانة
اه منك ...واه يانا
يامصر ياللي واقفة شقيانة
ليه دايما تعبانة وتعبانا
يا مصر قومي ..ثوري
جاهدي في سبيل ضحكتك
مال ضحكتك صبحت خزيانة
اضربي في درب الحرية
طريق
اسلكي في مسلك العلما
صديق
وانقذي من نهر نيلك
غريق
انا برئ..انا برئ

يا شمس متسلطة على القفا
وبشعاعك حرقانا
اشرقي و اصبحي
الظالم هيختفي
احرقيه نارك الي حرقانا
ومديني من كل شعاع
بنور
قويني بيه
خليني اثور
واحرت الارض من جديد
ديه الارض بور
منبتش فيها من سنين
غير كل جور

اصرخ..احتج..اثور
على كل ظالم قاعد
مدد رجليه جوا البحور
مادد ايديه جوا الجيوب
ياكل
يشبع
يكرش
هو والي حواليه
وناسك الطيابة بتجوع

يا مصر ياللي ناسها طيابة
فالحة الارض زرعاها طيابة
تخرج نبتها تخرج اصالة
لا فينا جبان
ولا فينا خسيس
ولا الي فينا يببيع البلد بالرخيص
وان باعها واحد منها ميبقاش منها
ولا كلش من زرعها
ولا شربش من ريها

يا مصر مهما الفجر طال
لابد من بزوغ النهار
ساعتها هنفتكر ونضحك ونسمع
ضحك النهار
اصل السجن بار
وبقا بينه وبينا تار
وزي ما قال حليم
ديه حكاية ..
ديه حكاية شعب وتار

يا مصر ناضلي في سبيل حريتك
قومي فكي كل القيود
عمري ما شفتك مستسلمة
حتى لو ربطوكي بميت سلسلة

يا مصر قومي ثوري اجمعي العباد
اجمعي نبتهم من كل واد
ثوري في وجه الظلم مهماش بطالمة ولا رومان
بس دول باعو البلد للئام
بتمن خسيس
بتمن رخيص
من غير مزاد
اهي قامت مصر يا ولاد
هتفك القيود
هتبذل وعود
الزمن هيعود
وقفت تثور
الظلم يغور
تناضل ..تجاهد..تسافر..تعافر
ناضلت..وقفت..ماتت ..عاشت
عاشت مصر حرة مستقلة

الولد

كان ميلاده من عشرين

فرحوا وهنوا
باركوا وزغرطوا وهالوا
طاروا اهله مبشرين
كل حبيب وقريب
ونسمة طايرة وغريب
ااااااااااااه يا بلد
جالهم ولد
بعد طول السنين
وما يعرفوا انه في يوم هينجلد
بسوط ظالم من الظاليم
ضهره عذاب وبطنه حنين
وما يعرفوا اذا كان عدو ولا حبيب

نزل الولد وشال الهم
مشلش معاه لا خال ولا عم
ملى الدنيا صراخ وعياط وداق المر..
هم يزغرطوا
يشتد في البكا
هم يزغرطوا
عنيه تزوغ في الملا
هم يزغرطوا
شايف وشوش مبهجة
بيعيطوا ولا بيضحكوا من البكا

تفوت ايام ..وتمر شهور ..وتعدي سنين
واقفين
في نفس المكان
الي كنا فيه مستنين
امل الولد ونجاحه
نفسه يشوف الامل بعنيه
معدي البحر بملاحه
يشاورله وينده عليه
يقرب اكتر هنا
هنا جنبه
قبل الايام ما تأسى عليه
وتروح الفرحة
ويجي الحزن
ويغطوا الضحكة بالطرحة
ويبكى الولد
وقلبه يأن
نفسه في يوم يشوف زرعته صالحة
ويعرف ان بذرته مكانتش طالحة

يصرخ...يبكي...وتدمع عنيه
يبكي بدل الدموع دم
ما لوحده شايل هم
وحياة شكلها يغم
ونفسه في صرخة ام
في ضمة ام
في دعوة ام
تشيل الهم

ضاع الحلم يا ولد
ضاع الحلم تحت القرار
هرب الحلم وبلغ فرار
سمع الولد صرخة نهار
واتبدلت مظاهر فرح
لصوان
وسمع الزغروطة
صوات
واهل البلد
معازيم
يشوفه الولد
حزين
راحت ليالي ملاح
وملى الدنيا بصراخه نواح

=====
عمرو سيد

عشوائي ...ولكن

انا عشوائي …..ولكن

في دنيتكم يا سادة مليش اماكن

عشان دنيتكم بالاماكن

الي راس ماله فيلا ولا حتى قصر بالجنانين

وانا عايش يا دوب في شقة

ويمكن نعيش في الكباين

انا عشوائي ….و ساكن في مناطق شعبية

دور عليا في امبابة او السيدة و المنشية

او يمكن تلاقيني تحت صخرة مرمية

من فوق جبل الدويقة

وقعت على دماغي ودماغ العيال والولية

انا عشوائي ….ولكن بنظام

علموني اهلي للكبير احترام

وللصغير عليا شوية طبطبة وحنان

ولو عارضت كبير اعارضه بدون صدام

اصلهم عيلتي و عوايدهم مدياني الامان

انا عشوائي …..ومش قضية

ساكن في مناطق قالولي عشوائية

طب ازاي؟؟ والحكومة معترفة بيا

بدفع ضرايب على شوارع غير ادمية

ولو يوم غلط ورحت مستشفى ياخدو حباب عنيا

طب ازاي عشوائي ومعايا بطاقة قومية

واسمي يا سادة ينجحكم في الجداول الانتخابية

لو كانت شورى او شعب او حتى رئاسية

انا عشوائي ….وعندي ارض زراعية

ونبت ارضي يا سادة يحرم على الجماعات الارهابية

انا نبت ارضي يا سادة الشيخ شريف

حافظ القران الكريم

و11 الف من الاحاديث النبوية

وهتعجبوا لو عرفتوا ان عنده من السنين عشر مية

انا عشوائي ….وعندي ارض خصبة طينية

انا نبت ارضي خرج محاسبين ومحامية

واصحاب مناصب دبلوماسية

او حتي شركات هندسية

انا نبت ارضي يا سادة مقاولين وفوعلية

ده نبت ارضي يا سادة فين نبتكم

يا اصحاب الاراضي الكيماوية

انا عشوائي ….وغنايا ليه قضية

ولكل كلمة معني وحكاية واغنية

واسالوا عبد الباسط ودرويش وعدوية

ومطلب وكارم واسامي تانية

والحاج امين صاحب القصائد الشعرية

انا عشوائي ….ولكن عايش في سلام

صاحبي مسيحي ولا دينه الاسلام

متفرقش معايا مايكل من عيسي او عبد السلام

كله بيصحي وينام

ومعانا تحس بالامان

عموما ان عشوائي ولكن بنظام

ومافيش بيني وبين الحكومة صدام

اصل انا عشوائي واساله عني النظام

الماضي مات

مرت سنين على الي فات
بالنسبة لها الماضي مات
بس مفيش جرح بيموت
مفيش يوم يعدي من غير صوت
صوت لألم كان من سنين
ولا عدى يوم من غير حنين
لحب السنين
صحيح كله فات
بس الماضي عمره ما مات
كلمتها
سألتها
ليه عشتقتي؟
ليه عشقتي من بعدي؟
قالتلي مالي ذنب
ده قدر
كان لازم انساك
لازم اداوي جرحي
الي جرحتهولي
كان لازم ارجع صبحي
الي امستهولي
انت اخترت الفراق
وانا اخترت العشق
اصل العشق داء
والحب داء
ومين بعدك يداوي عشقي
غير عشق
عشت من بعدك مجروحة
عشت من بعدك مدبوحة
والله ده لوعدت سنين
ما انساك
ما اقدرش على غيابك
واستنيت كتير لوقياك
حبيتك اه
عشقتك اه
ودبت في هواك
الجرح مش جرحي
ولا الذنب ذنبي
انت الي اخترت الفراق
وانا اخترتك
انت الي اخترت البعاد
وانا اخترتك
اخترتك واحترت معاك
كل يوم بيعدي وانا مش جنبك
بموت فيه الف مرة
كل يوم بيعدي ومسمعش صوتك
بندبح فيه الف مرة
وما بين كل مرة ومرة
عذاب
وحشتني لمستك
عشت بكلمتك
ولكلمتك
هويتك
عشقتك
جرحتني
بس خلاص عدت سنين
على الي فات
وانسى اصل الماضي مات

سياسة

قاعد في قعدة مزاج ليلية
انا والعيال وكمان الولية
سمعت مرة غندورة اعلامية
عمالة تتكلم عن السياسة
بصتلي مراتي بكل بساطة
وكان سؤالها بكل غرابة
يعني ايه سياسة يا جوزي
ولا ده كلام اراجوزي!!
سياسة يا سوسو يعني تسوس
قلتلها الكلمة سياسة واصلها ساس
وبيقولوا جاية من الالماسة
واصل السياسة يعني يسوس
بالمضارع يعني تسوس
توقع بين بلدين او كمان اخين
وتفرقهم ويبقوا خايفين
وما يجتمعوا على كلمتين
ويخرج براها هو زي الماسة
برده يا جوزي يعني سياسة؟
بلا سياسة بلا قرف يا ولية
قومي اعمللنا وقية بامية
او حتى ملوخية
هو احنا اد السياسة
ربنا يبعدنا عن ساسة
ولا يقوعناش في ماسة
ولا يوقعوا بينا بتوع السياسة

مقابلتي مع الرئيس

قال حلمت يوم اني قاعد مع الرئيس

بعد ما قفللنا ميدان رمسيس

قلتله حصلي شرف مقابلتك يا سعادة الرئيس

قالي انت اصلا مين

غاظني بسؤاله اللئيم

واكنه رماني في الجحيم

قلتله انا المكافح المصري

وسابق كل عصري

قلت يمكن يفتكر انه اصلا مصري

قالي بعنتظة وانت ايه الي جابك قصري

قلتله برخامة قصرك ده حق كل مصري

يا ريسنا انا طفت البلاد

بين العباد

عشان اقدم شكوتي في الفساد

بصراحة يا ريسنا الكيل فاض

والفساد انتشر في البلاد

عم كل البلاد

والفساد بين العباد

زي الجراد

قاضي على كل الخضار

وكان اراضينا مسرطنة

بتطلع فاكهة معتنة

وبيحموها بالدسترةوكمان المهية متبخرة

وتقعد على فيض الكريم

ونسأل لله يا محسنين

ولا عدش سائل فينا مسئول ولا حتى وزير

قالي عايز ايه مننا

قلتله هو انت مش واحد مننا

دمك هو دمنا

وحلمك هو حلمنا

وزرعك هو اكلنا

والنيل شربك وشربنا

يبقى لازم تحلها

وتشيل الفساد منها

ورايه العدل ترفرفها

والقانون سيد عليها كلها

على كل مسئول ووزير في ارضها

عشان تلاقي حلوها بيتزرع في ارضها

ونعمة ربك زرعها

والشعب يحبك زيها

وتبقى واحد منها

وسمعت صوت الاذان

والفجر شقشق والعدل بان

واللئيم اختفى من الاحلام

اصل ابليس بيختفي مع صوت الاذان

بلد الامن والامان

خير اللهم اجعله خير جاني خبر التفجيرات حسيت ان واحد من اهلي مات قلت ليه طب ازاي طب بكام باعوا البلد للئام كل ديه اسئلة في الاذهان قلت مين قتل مسكين طب حد مات من سكات في التفجيرات قالوا طفلة وكام اجنبي والباقي اصابات لمصلحة مين يبيع سنين من الامان لما تتضرب اجنبي طب والنبي ده اسمه كلام ده ضيف عندك جوه بلدك وعايز تضربه بالنعال شيل الكلام ده من دماغك وتفكيرك في الارهاب لا عمر ده كان من الدين ولا من عوايد الاسلام لمصلحة مين تشمت فينا الامريكان وكمان ولاد العم سام بحجة ضاع من مصر الامان قلت مجنون الي يموت ويموت معاه الابرياء بيجروا على لقمة عيشهم في الزحام وامنيتي الي عملها يبقى في خبر كان او اشوفه في بدلة الاعدام وميستهلش يبكي عليه حد الي عايز الجبل ينهد جبل الامان بنناه زمان بدم شعبنا الي مات ويا ريت الاقي لسؤالي جواب قبل ما يدخلوا علينا الذئاب ومن سكات خلص الكلام وهتفضل مصر بلد الامن والامان